(ملحمة مصرية)

ما بين يونيه وأكتوبر بعد نكسة خمسة يونيو
كنت بامشي في المدينة
كنت أشوف الناس حزينة
الشيوخ جنب البنات
كات حزينة ((الفترينات))
الشباب ساب الشوارع
البيوت كانت الخنادق
الإيدين حاضنة البنادق
والعينين على رمل سينا
****
الآمال كانت بعيدة
والعساكر كات عنيدة
واليهود صالت وجالت
والرمال باتت تئن
أعمل إيه؟ قرقشت صبري
عين بصيرة.. وإيد قصيرة القناة صبحت أسيرة
القناة بقت الحدود
والتاريخ ادانا ضهره
وادى وشه لليهود!
والغلط كان منا إحنا
نص وطني كان أسير
كنت أقوم بالليل وأمشي
كان قمرنا في سمانا نصه إسود
زي لون يونيه الحزين
نوره خافت.. العيون عميت ما شافت
إلا نكسة خمسة يونيه
****
رحت أعزي في الصوان
((لجل)) واحد مات شهيد
خاله يابني مال علي وقاللي دنيا
كات عنيه بتقوللي يونيه
نكتة بايخة.. بايخة جدا
الخصوم قالوا ما في فايدة
بالمتاجرة بالمزايدة
القلوب كات ولعة قايدة
كان شموخ النخل واضح
جوه في عنين الصعايدة
****
النفوس م اليأس شاطت
والرؤوس أبدا ما طاطت
شفت نخل بلدنا شامخ
والأمل جؤانا راسخ
كان ضروري يكون مراجعة
ليه جلبنا النكسة يا مه؟
هوه يعني النخوة ماتت؟
واللا يعني ما عادش همه؟
كان سببها حاجات كتير
عود لوحده سهل كسره
صعب جدا لو في حزمة
البلد باتت في أزمة
****
كان ضروري نلم ناسنا
كان ضروري نعيد أساسنا
جمعونا حطام عساكر
دربونا.. وعلمونا.. وفهمونا
نقول بلدنا.. والحكاية ما انتهتش
****
كان عدو واحتل دارنا
كان عدو وخنق نهارنا
واحنا شعب أصيل بطبعه
في الشدايد انصهرنا
****
الجيوش دي قشرة صلبة
من معادنها الشعوب
التفاعل كان حقيقي
رغم ضيق الكون وضيقي
رغم ليلي.. ورغم طوله
كنت عارف فين طريقي
السواعد في المصانع
فلاحينا في المزارع
العساكر عا المدافع
((الكنايس والجوامع))
سيمفونية كات بتعزف
في المعارك كله شارك
الحرامي… لم ايده
الشوارع كات مضاءة في المدينة
والوشوش كانت بتضحك
مش حزينة
****
واللي يبيع الجرايد كان يغني
كان ينادي يا بلادي يا بلادي
إقرا يا ابني إقرا الحقيقة
البيانات الدقيقة
البيانات الجريئة
إقروا اسمعوا يا جماعة
إسمعوا صوت الإذاعة ذ
الأوامر كات صريحة
الأوامر كات مطاعة
خبازين العيش يغنوا
والسعادة فوق وشوشهم
سواقين الهيئة هدوا
والعيال ((النونو)) عدوا.. للمدارس
يا وطن ميت ألف فارس
يا وطن عبروا في لحظة
يا وطن الله أكبر
يا وطن والمولى حارس
****
ابتسامة شعب كامل… شعب عامل
فرحانين ((لجل)) العبور
سواقين التاكسي بعتوا
بسمة لرجال المرور!
****
شفت خالي أبو قلب صافي
جاي يجري.. جاي حافي
شق صدر الكون بضحكة
أعلى من جرس المطافي
قال بلدنا أمانة غالية
قال بلدنا رايتها عالية
في الشوارع.. في الحواري.. في النجوع
قلنا كلمة.. قلنا كلمة
ما فيش رجوع
كله غنى بلدي بلدي
شمسنا غسلت شعورها
والشعور كان لونها دهبي
القمر كان لونه فضي
فاسمح لي يا مصر أغني
****
غني يا بني غني غني
أنا منك.. وأنت مني
لو تنام عينك ما أنا أمشي
لو ح أدوس عالشوك
راح أمشي
يا مه نن العين ورمشي
دول فداكي إطمأني
التاريخ من فجر فجرك
والكرم مقداره قدرك
لما جاع الكون لقمحك
كنت بالخير فاردة حجرك
ضمي يا مه الحضن ضمة
فيكي همه.. واحنا لمه
دا أنا لو مش مصري يامه
أبقى مصري بالتمني
****
التاريخ منقوش في بابك
خد شبابه من شبابك
التاريخ عطره.. في ترابك
لو تاريخ الدنيا كله يجمعوه
راح يلتقوه..
سطر في كتابك
****
يا قمر في سمانا لالي
حقي عاد بالقوة جالي
((العمد)) ويا المشايخ
((الغفر)) ويا الأهالي
الأهالي الفلاحين
الأهالي الشقيانين
الأهالي المؤمنين
في الصلا الشيخ بيدعي
في الصلا الناس بتدعي
في الصلا الجيش بيدعي
والوطن…
الوطن بيقول آمين

[شفيق سلوم] [الشاعر] [قالو عنه] [الجديد] [دواوين] [الوصية] [املالي كاس يا وطن] [آه يا ليل يا وطن] [صحف ومجلات] [إذاعة وتليفزيون] [ندوات] [مقالات] [اتصل بنا]